سمیناری دیالۆگ لە پێناو یەکخستنی هەڵوێستەکان بۆ پشتیوانیکردنی رۆژئاوای کوردستان لە هەولێر بەرێوە چوو

سمیناری دیالۆگ لە پێناو یەکخستنی هەڵوێستەکان بۆ پشتیوانیکردنی رۆژئاوای کوردستان لە هەولێر بەرێوە چوو

پێشنیار و راسپاردەکانی سمیناری (دیالۆگ لە پێناو یەکخستنی هەڵوێستەکان بۆ پشتیوانیکردنی رۆژئاوای کوردستان) لە شاری 

هەولێر

 کاتژمێر 10ی سەرلەبەیانی  رۆژی سێشەمە 7ی ئۆگستی 2012 ، لە میوانخانەی چوارچرای شاری هەولێر، لە لایەن گروپی پشتگیری لە رۆژئاوایی کوردستان، سمیناری (( دیالۆگ لە پێناو یەکخستنی هەڵوێستەکان بۆ پشتیوانیکردنی رۆژئاوای کوردستان )) بە بەشداری نوێنەری ژمارەیەکی زۆر لە پارت و لایەنە سیاسییەکانی هەرچوار پارچەی کوردستان و کەسایەتی و چالاکڤانان بەڕێوە چوو .

ئامادەبووان لە بابەت و لێدوانەکانیاندا  جەختیان لەسەر ئەم داواکاری و راسپاردانە کردەوە کە لە خوارەوە هاتووە ، ئێمەش  وەک  گروپ بە ئامانەتەوە دەیخەینە  بەردەست رایگشتی و  لایەنە بەرپرسەکانی باشوری کوردستان و لیژنەی باڵا  لە رۆژئاوای کوردستان :

1-         حکوومەتی کوردستان هاوکاری رۆژئاوای کوردستان بە گشتی وە شارە ئازادکراوەکان بە تایبەتی بکات و یارمەتی کاتیان بۆ دیاری بکات.

2-         پێویستە نەتەوەی کورد یەک دەنگ و یەک  هەڵوێست  بێت لە پشتیوانیکردنی  رۆژئاوای کوردستان لە روی سیاسی و مادی و مەعنەوییەوە .

3-         یەک  ئاڵا لە رۆژئاوای کوردستان هەبێت  هەموو پێکهاتە سیاسیەکان  تێکۆشەرەکان لەسەری رێکبکەون.

4-         هاوکاریکردنی  بە پەلەی  ئەو ئاوارانەی رۆژئاوا کە لە باشووری کوردستان  دەژین  .

5-         پێویستە کەمە نەتەوایەتی و ئاینیەکانی دیکەی دانیشتووی رۆژئاوای کوردستان بەشدارییان پێ بکرێت  لە ئۆرگانەکانی سەرکردایەتی رۆژئاوای کوردستان  .

6-         پێویستە دەستەی باڵا پەلە بکات لە رێکخستنی دەزگاکانی بەڕێوەبردن .

7-         تێکدانی  یەکڕیزی  نەتەوەیی کوردان لە رۆژئاوای کوردستان  هێڵی سورە.

8-         ئەزموونی ناوچە دابڕاوەکانی باشووری کوردستان لە بەرچاو بگرن ،لە دەستنیشان کردنی سنووری جوگرافیای رۆژئاوای کوردستان.

9-         پێمان باشە دەستەی  باڵا  ناوی  ببێتە دەستەی  باڵای رۆژئاوای کوردستان.

10-       دەزگاکانی راگەیاندن رۆڵی زیاتر بگێڕن  لە پاراستنی  یەکڕیزی کوردان و دەرخستنی نەهامەتییەکانیان و خۆدورگرتن لە بڵاوکردنەوەی  هەواڵی ناڕاست و هەڵبەستراو  سەبارەت بە لایەنەکانی  رۆژئاوای کوردستان.

11-       داوا دەکەین  نوێنەرانی کورد  لە بەغدا رۆڵ ببینن لە گۆڕینی سیاسەتی دەوڵەتی عێراق  بەرامبەر بە رژێمی سوری .

12-       وەستانەوە بە روی هەڕەشەکانی تورکیا و دەستخستنە ناو کاروباری رۆژئاوای  کوردستان.