Ads 468x60px

25 May 2017

مێژووێک تژی لە خیانەت





مێژووێک تژی لە خیانەت
پارتی و بنەماڵەی بارزانی؛ مێژووییەک لە تیرۆر و کووشتنی سیاسی لە کوردستان
 پارتی و بنەماڵەی بارزانی؛ حەفتا و دوو ساڵ کورد کوژی لە کوردستان
دەستپێک
تیرۆر وکووشتن و شەهیدکردنی پێشمەرگە و چاڵاکڤانانی مەدەنی و رۆژنامەنووس‌ و نووسەرانی کوردی(رۆژهەڵات) کە لە عێراق‌ و هەرێمی کوردستان لەسەر دەستی پارتی دیمۆکراتی کوردستان بەتایبەت و یەکێتی نیشتیمانی کوردستان لەماوی نیوو سەدەی ڕابردوودا ئەنجامدراوە کەمتر نین لە
پێشێلکاریی مافەکانی مرۆڤ و کووشتن و ئێعدام و زیندانیکردن  لە رۆژهەڵاتی کوردستان لە لایەن رژێمی ئێرانەوە بەدڕێژایی تەمەنی دەسەڵاتی ستەم شایی ئێران و دەسڵاتێ ئاخوندەکان....

ئێستاش ئەو مەکینە زەبەڵاحەی تیرۆر و قڕکردن و کووشتن و ئەشکەنجە و ڕادەستکردنەوەی چالاکڤانانی سیاسی و مەدەنی کوردی باکوور،رۆژئاوا و رۆژهەڵات و باشوور لەلایەن ئەم دوو حیزبەوه، یەکێتی و پارتی دیمۆکراتی کوردستان لەکار نەوەستاوە،رۆژ نییە ئێمە گوێبیسی ھەواڵی تیرۆری مرۆڤێک،قەڵەمێک،لاوێکی خوێن گەرم و ئازاد و ئازا و چاونەترس نەبین لە باشووری کوردستان. ئەمە یەکەمین جار نەبووە کە دەستی تیرۆر قەلەمێک بشکێنێ و ئازیزێکمان لێبکاتەوە، مێژووی (26)ساڵی ڕابردووی دەسەلاتدارێتی لە کوردستان مێژووی خوێنڕشتنی مرۆڤەکانە بووە،مێژووی خوێنڕشتنی نەیارانی سیاسی پارتی بووە،مێژووی تیرۆری کەسانی ڕەخنەگر و ئازادیخواز بووە،مێژووی تیرۆری ڕۆژنامەنووسان و لاوان و و ژنان بووە.ئەمانە تاکەی و بۆ دەبێ بەردەوامی هەبێت؟ ھۆکارەکانی پێشێلکردنی ئازادی سیاسی، بیروڕا دەربڕین، بڵاوکردنەوە و چاپکردن، و خوێنڕشتنی دەنگە جیاوازەکان بە دەسەلات و دنیای ناعەدالەتی ئەمڕۆ کامانەن ؟ ئەو ھۆکارانە کامانەن کەوا لە چینە باڵا و دەسەلاتدارەکانی دوو بنەماڵەی مافیای کورد ئەکەن بە ئاشکرایی دەست بۆ تیرۆر بەرن. دنیای ژێردەسەڵاتی ھیزە میلیشیایەکان، جوگرافیای ژێر قەڵەمرەویی بزوتنەوە نەتەوەییەکان و ئیسلامیەکان، ناکرێت خاڵی بێت لە سەرکوت، تیرۆر، پیشێلکردنی ئازادیەکان، ژن کوژی، قەڵەم کوژی و ئازادی کوژی ….تاد.
 مێژووی تیرۆری سیاسی و هزری لەناو کوردا ڕیشەی دەگەرێتەوە بۆ (مەڵا مەستەفای بارزانی)سەرۆک عەشیرەتی بارزانی و شۆڕشی بارزانییەکان بەپێی سەرچاوەکانی مێژووی بزووتنەوەی ئازادیخۆازی کورد لە هەموو بەشەکانی کوردستانی ژێردەست و کۆلۆنیاڵی داگیرکەران،لەناو شۆڕشی رزگاریخۆازی کوردیدا پێش ئەوەی دوژمنانمان هەوڵی تیرۆر و شەهیدکردن و کووشتنی سکرتێر و کادیر و شۆڕشگێر و بیرمەندە گەورەکانی کورد بدەن دەستی خەیانەتی ناوخۆیی کورد و بەتایبەتیش سەرۆک هۆزی کوردەکان ئاوڵەتر بووە بۆ پاکسازی و تەسفیەکردنی نەیاران و ڕەخنەگرانی ناوخۆیی،ئەوەیش‌ ئەو ڕاستیمان بۆ رووندەکاتەوە کە کورد لەناوخۆیەوە زیاتر کورزی وەبەرکەوتووە تاکوو دەرەوە.
 هەرێمی کوردستان (باشوور)لە ئێستادا بە سێگۆشەی مەرگی نووسەر و رۆژنامەنووس و چاڵاکوانانی مەدەنی هەژمار دەکرێت و لەدوای رووداوەکانی ساڵی (2009) و جیابوونەوەی باڵێکی تر لە یەکێتی نیشتیمانی کوردستان بەناوی (گۆڕان)و دەستپێکی قۆناغێکی نوێ لە شۆڕش و گۆڕانکاری ڕیشەیی لە ستراکتۆرەکانی دەسەڵاتی سیاسی لە کوردستاندا و خۆپێشاندانی جەماوەری و هەستان و ڕاپەرینی خەڵکی باشووری کوردستان لەدژی قۆرخکاری و تاکڕەویی و دیکتاتۆرییەتی دوو حیزبی کوردی لە کوردستانی باشوور زەمینەی بۆ تەقینەوەی دەنگی ناڕەزایەتی شەقامی کوردی خۆشکرد کە تەواویی ڵایەنگرانی رووخان و گۆڕانکاری و هەڵوەشاندنەوەی حکوومەتی مافیای حیزبی لە کوردستان ڕاپەرین لە دژی دەسەڵاتی مافیای دوو بنەماڵەیی لە باشووری کوردستان.
لەوساوە تاکوو ئێستا هەرێمی کوردستان بە ناوچەی ترس و تۆقان ناوی دەرکردوە،بەشێوەیەک بۆتە مۆڵگەی نەیارانی دژی ئازادی و ئەندێشه و ڕامانی جیاوازی لایەنە سیاسیەکان و کەسایەتیە سەربەخۆکانی دەرەوی دوو دەسەڵاتی مافیای بارزانی و تاڵەبانی.
حکوومەتی میلیشیایی یەکێتی و پارتی:
 لێرەدا بۆ تێگەیشتن لە دیوێکی تری رووداو و کارەساتی تیرۆری فیکر و جەستەیی لە هەرێمی کوردستان دەبێ ئاوڕێک لە مێژووی ڕابردووی ئەو دوو حیزبە بدەێنەوە کە پارتی دیمۆکراتی کوردستان و عەشیرەتی بارزانی پشکی شێرییان بەردەکەوی و دەستێکی باڵایان هەیە لە سەرکووت و سڕینەوەی نەیارانی فیکری ڕێبازی بارزانی باوکدا و بەتەواو مانا خۆیان لە چوارچێوەی دەسەڵاتێکی ملهۆر و ستەمکار و دیکتاتۆر دا پێناسە کردوە و بەدڕێژایی تەمەنی دروستبوونی تەنیا و تەنیا بۆ کووشتن و تیرۆر و فرۆشتن و تێکدانی ئارامی و ئاسایشی ناوخۆی کوردستان دروستبوونە و گورزێکی گەورەشیان لە مێژووی سەربەخۆیی و دروستبوونی کیانێکی سەربەخۆی کوردی داوە بە خۆدانە پاڵ تەواوی دووژمنانی کورد لە هەر چوارپارچەی کوردستان...
 یەکیک لە تایبەتمدندیەکانی پارتی دیمۆکراتی کوردستان دروستکردنی دەسەڵاتی میلیشیاییە لە کوردستان، بەومانایەی کە دەسەڵات ھیچ بنەمایەکی یاسایی نییە و پەیرەوی لە ھیچ یاساو ریسایەکی دانپیانراوی نیودەوڵەتی ناکات و لەراستیدا ناتوانێ بیکات، چونکە ھیچ بەرپرسیاریەتێکی نێودەوڵەتیشی لە ئەستۆ نییە و تەنیا بۆ زاڵبوون و هەیمەنەیعەشیرەتی بارزانی بەسەر کورد و کوردستاندا دامەزراوە،دەسەڵاتیک لە نەبوونی ھیچ جۆرە "دەولەتێک"لە نەبوونی"یاسا"ھیچ چەشنە یاسایەکی سەراسەری پەیڕەولێکراو، ناتوانێ ھەڵگری مناکانی دژی ئازادی و مافە فەردی و مەدەنیەکانی خەڵک نەبێت، ناتوانێ دەست لە جەنگی دژی ئازادی ھەڵگرێت.چۆن هیچ چەشنە ئازادییەکی قەبووڵ نییە ئەگەر لەدەرەوی هێز و ئێرادە خێڵ و دیوەخانی ئاغاکانی خۆیان پێناسەی بۆ بکرێت.هه‌ر ده‌سه‌ڵات ،حکومه‌ت ،یان ده‌وڵه‌تێک په‌یامێکى ئاینى، مه‌زهه‌بى، فه‌لسه‌فى يا فکرى و جیهان بینیه‌کی تايبەت بەخۆی هەیە بۆ گەویشتن بە ستراتیژی و ئامانجە دڕێژ خایەنەکانی خۆی..
 دەسەڵاتی پارتی دیمۆکراتی کوردستان و عەشیرەتی بارزانی، نمونەیەکی بەرجەستەی دەسەڵاتی میلیشیاییە و ئەلگۆیەکی بەرجەستەی سەرکووتی ئازادی و مافی تاک و ئیرادەی ئینسانەکانیەتی.
لە کوردستان بەھۆی نەبوونی دەولەتەوە، بەھۆی نەبوونی ناسنامەی هاوڵاتییەوە، بەھۆی نەبوونی یاساوە، بەھۆی نەبوونی پێکھاتە یاساییە باوەکانی دنیاوە لە چەشنی” پەرلەمان، حکومەت، دەسەڵاتی دادوەری،….تاد، حزبی خاوەن ‌ھێزی چەکداری زەبەلاح بە ئەندازەی ھێزە چەکداریەکەی قەڵەمرەوی دەسەڵاتی خۆی داسەپاندووە، ناوچەی حکومرانی بۆخۆی دابڕیوە و لەگەڵ ھەر ئاڵوگۆرێکیش لەو ھیزەدا، ئاڵوگۆر لە قەڵەمرەوی دەسەڵات و ناوچەی حوکمڕانیدا روودەدات، ھەموو یاساو ریسایەکیش” دیارە یاساو ریسا نایاسایی” تەنیا لەو شوێنە مانا پەیدا دەکات کە ئەو میلیشیاییە دەسەڵاتی خۆی بەسەریدا داسەپاندووە. یاساو ڕیساکانی ژێر قەڵەمڕەوی دەسەڵاتی زەرد، لە ژێر قەڵەمڕەوی دەسەلاتی سەوزدا، و بە پێچەوانەشەوە، کاریگەریان نییە. تەنانەت دەزگا کانێ ئاسایش، دژە تیرۆرەکان، پاراستن و زانیاری، پیشمەرگە… دەزگاو ئامرازی جۆگرافیایی جیاوازی سەوز و زەردن. تەنانەت میدیای ژیر ئەم دوو جۆگرافیایە، ھەریەکەیان مۆری سەوز و زەردی پێوەیە بۆ جوانکردنی سیمای ناشیرینی حکوومەتی میلیشیایی لە کوردستان..
جەنگی نیوان ئەم دوو میلیشیایە خاوەن ” پەرلەمان و حکومەت” ە، لەگەڵ یەکتری بۆ پاشەکشەکردن بە یەکتری و لاوازکردنی یەکتری، بە ھاوکاری وڵاتانی ناوچەکە، میژوویەکە ھەم خوێناوی و ھەم پڕ پیلان و سیناریۆ.
جەنگی ھەردوو لاشیان لە دژی ئازادی و ئازادیخوازی لەھەردوو جغرافیاکەدا، میژوویەکە بە ئەندازەی دەسەڵاتدارێتیان لە کوردستاندا.
جەنگی ئەم دوو ھیزە میلیشیایە، لە دژی ئازادی و ئازادیخوازی، لەدژی مافە فەردی و مەدەنیەکان، لەدژی ژنان و ئیرادەی ئینسان و یاساو رییسای مۆدێرن، لە١٩ ساڵی رابردودا بۆ یەک ساتیش چییە لەوەستان نەکەوتووە. ماشێنی دژی ئازادی ئەم ھێزانە کە دەریایەک لە داھاتی خەڵکی کوردستانی دەکرێت بە گەروودا، رۆژ بە رۆژ تازەدەکرێتەوە، رۆژ بەرۆژ قایمتر و فراوانتر دەکرێت.
بۆیە بەسادەیی دەکرێت بڵێین، یەکیک لە بەرامبەرکێ ھەموو رۆژەو بەرچاوەکانی ناو کۆمەڵگای کوردستان بەرامبەرکێی ھیزە میلیشیایەکان لەگەڵ رەوتی ئازادیخوازی ئازادی بووە. ململانیی نیوان ئەم دوو بەرەیە، ململانیەکی درێژ و ھاوکات خوێناوییە.
دەسەڵاتی میلیشیایی لە کوردستان، کەش و ھەوای نیمچەئاواڵەی سیاسی وئەو بڕە لە ئازادی کە لە کوردستان ھەیە بە خێرو سەدەقەی خۆی دەزانێت، بە بەرھەمی رێزگرتن لە مافی مرۆڤ و بوونی دیموکراسی و دەوری دەسەڵاتدارێتی خۆیانی دەزانن، کە داویانە بە خەڵکی کوردستان و ھیزە سیاسیەکان و میدیا، لەوە تێناگەن یان نایانەوێ تێبگەن و دان بنین بەوەدا کە دۆخی نیمچە کراوەیی سیاسی و ئەو رادەیە لە ئازادی کە لە کوردستان ھەیە.
 هه‌ر ده‌سه‌ڵات،حکومه‌ت،یان ده‌وڵه‌تێک په‌یامێکى ئاینى، مه‌زهه‌بى، فه‌لسه‌فى يا فکرى و جیهان بینیه‌کی تايبەت بەخۆى هه‌یه‌ بۆ په‌روه‌رده‌و ئاراسته‌کردنی کۆمه‌ڵگە له‌هه‌موو بواره‌کانی خوێندن و په‌روه‌رده‌، ئابوری، یاسا، سیاسی و فه‌رهه‌نگی، ئیتر ئه‌م په‌روه‌رده‌یه‌ باش بێت یان خراپ ده‌بێته‌ ناسنامه‌ی ئه‌و گه‌ل و کۆمه‌ڵگايە یان گروپه‌ ،ئه‌گه‌ر ئه‌م په‌روه‌رده‌و فکرو جیهانبینیه‌ مایه‌ی قبوڵی کۆمه‌ڵگە بێت ئه‌وا ده‌مێنێته‌وه‌.ئەگەریش ببێتە ئایدۆلۆژیایکی شمووڵی داسەپێندراوی دەستی ملهۆری گروپێک یا تاخمێکی دەستڕۆیشووی سیاسی مەشەروعییەت وەرگری مێژووی خەبات و تێکۆشانی ئازادی و سەربەخۆیی ئەوە بێگومان تەمەنی زۆر کورتخایەن دەبێت و رۆژێک دادێت بەزەبری ئێرادە گەل خاپور دەبێ و نموونەی لەو شێوەیەمان زۆر لەبەر دەستە...
 پرسیاری بابه‌ت ئه‌مه‌یه‌ تایبه‌تمه‌ندی کۆمه‌ڵگەی میلیشیای چیه‌؟ هه‌تا میلیشیای(بانده‌) ئابوریه‌کانیش بۆ ره‌وایه‌ت دان بە ‌ده‌سه‌ڵاتی میلیشیایی عەشیرەی بارزانی خۆيان دروشمێکى مه‌زهه‌بى يان به ناو فکره‌یه‌کی سیاسی، نه‌ته‌وه‌یی یان هه‌تا ناوچه‌یی و خێڵه‌کی هه‌ڵ ئەگرن؟
له‌رووی ره‌فتارو بیرکردنه‌وه‌و ئاره‌زوه‌کان هه‌موو ئه‌وانه‌ی که ‌له ‌ئه‌نجامدا خۆیان له‌چوارچێوه‌ى میلیشیادا ده‌بینه‌وه‌ جا هەر دروشم و مەزهەب و فكرەيەكيان هەبێ، ره‌فتار و عەقڵیه‌ت و ئاره‌زوی خێڵه‌ هه‌ره‌ سه‌ره‌تاییه‌کان هه‌ڵ ئەگرن، به‌ڵام به‌ئامرازو شێوازی تر و هه‌تا به‌درۆ و ساخته‌ی تازه‌وه‌ نەک ره‌فتار و عەقڵیەتی دامەزراوەيى و دەوڵه تى ،بەهەمان جؤر کۆمه‌ڵگەش هەمان ره‌فتار و عەقڵیەت و کولتوور و ئاره‌زوی خێڵه‌ هه‌ره‌ سه‌ره‌تاییه‌کانیان هه‌ڵ ئەگرێ.
له‌زۆر ڕوه‌وه‌ ،هه‌تا خێڵه‌ سه‌ره‌تاييەكان زۆر بێ ئازارتر و بێ زیانتر بوون له‌چاو ئه‌م گروپه‌ میلیشیایانه‌ی که ‌ئێستا لە هەرێمی کوردستانی (باشوور)بونیان هه‌یه‌،چونکه‌ له‌ناو خێڵه‌ سه‌ره‌تاییه‌کاندا گیانی دۆستی، هاوکاری و ژیانى هاوبەش سه‌رچاوه‌ی به‌رده‌وامی ژیان بووه،‌به‌ڵام له‌ناو کۆمه‌ڵگەی میلیشیایی پارتی و یەکێتی به‌پێچه‌وانه‌وه‌يه.میلیشیاکان بۆ پاراستنی ده‌سه‌ڵاتی خۆیان له‌ هه‌وڵی وێران کردن و روخانی هه‌موو به‌هاو بنه‌مایه‌کی کۆمه‌ڵایه‌تی دان جا هه‌ر فکره‌و دنیا بینێکیشیان هه‌بێ،کاتێک به‌هاکانیان نه‌هێشت ته‌نها به‌های بێ به‌های خۆیان ده‌مێنێت که‌ ده‌یانه‌وێ بیخه‌نه‌ شوێن به‌هاو بنه‌ما کۆمه‌ڵایه‌تیه‌ روخاوه‌کان که‌ نه هیچ بنه‌مایه‌کی مرۆڤی و زانستی په‌روه‌رده‌یی هەيە و نە هیچ ئامانجێکى سياسى،ئابورى و مرۆڤی و نيشتيمانى هەيه بؤ داهاتوو.له‌به‌رئه‌وه‌ ده‌بینن ئه‌م کۆمه‌ڵگەیانه‌ی که‌ میلیشیا فه‌رمانڕه‌وایه‌ تياندا کۆمه‌ڵگەیەکی روخاو و وێرانن و تاکه‌کانی بێ ئیراده‌ن و بێ بەشن لە پەروەردەى فیكرى و فەرهەنگى و شارستانیەتی .
له ناو کۆمه‌ڵگەى ميليشيايیدا،سەرۆک سیمبۆلە و تا ئاستى پەرستن پيرۆز دەکرێن له‌هه‌مان کاتدا ميليشياكان هه‌وڵده‌ده‌ن ئه‌م دروشم و فیکره‌ و مه‌زهه‌به‌ی هه‌یانه‌ له‌رێگه‌ی زه‌برو زه‌نگ و تیرۆر و تۆقاندنه‌وه‌ به‌سه‌ر کۆمه‌ڵگادا بسه‌پێنن.
له کۆمه‌ڵگاى ميليشياييدا پێناسەى چينايەتى له سەر بنەماى تواناى ئابورى ، مێژوويى و كولتورى چينايەتى نيه به لكو له سه ر بنەماى نزيكى ،دڵسۆزى و يا ملكەچ بوونه بۆ ميليشياو سەرۆکەکانی،واته کۆمه‌ڵگە ئەبێته دوو بەش يا له گه‌ڵ ميليشيای يان نا،له گه‌ڵ ميليشيا بوون هەتا ئەگەر به ساختەش بێ ئەوە ئیمتیازی ئابورى هەيه،چوونكه ئامانج و سياسەتى ميليشيا بەتايبەت ميليشياى ئابوورى تەنها دەست كەوتى ئابوريه هەتاکوو سياسەت دروشمیش بەكار دێ بؤ مەبەستى ئابوورى . رەوش و رەهەندى ئازادى و فه‌رهه‌نگيش به هەمان جۆره له ناو دەسەلاتى ميليشياییدا.
بؤيه،تایبه‌تمه‌ندی کۆمه‌ڵگا میلیشیاکان روخانى به‌هاكان ،وێرانی، بێ هيوايى تراژیدیا،شكانى كەسايەتى،هه‌ژاری،سته‌م و بێ دادی و بێ هيوايى و بێ ئايندەیی و کاره‌ساته‌، نموونه‌ی هەرە زیندویش ئه‌مه‌ی یەکێتی و پارتیە‌ که‌ له‌نزیکه‌وه‌ هه‌موومان ده‌یبینین.
بنەماڵەی بارزانی و کوشتنی سیاسی لە کوردستان؛
 پارتی بەردەوام ترسی لە ئازادی بیر و ئەندێشە هەبووە لە کوردستاندا چ لە چواچێوەی دەسەڵات و حکوومەت و چ لە چوارچێوەی خۆیدا وەکو پارتێکی سیاسی ـ ناسیۆنالیستی،ھەر ئەم ترسەش لە ئازادی وای لێکردوە، فریودان و سەرکوت، وەک دوو کۆڵەکەی سەرەکی بۆ پاراستنی دەسەڵاتی پارتی و بنەماڵەی بارزانی و دریژەدان بە قەڵەمرەوی سیاسی خۆی بەدەستەوە بگرێت.جا لە پێناو مانەوەی شکۆ و هەیمەنەی خۆی دەستی بۆ هەموو کردەوەیەکی قێزەوەنی کووشتن و سڕینەوە و تیرۆری جەستەیی نەیارانی فیکری بنەماڵەی بارزانی دڕێژ کردوە لە هەموو کوردستاندا.
 دەست بردن بۆ تیرۆری جەستەیی، لە تیرۆری ئازادیەوە دەست پێدەکات،دەست بردن بۆ تیرۆری جەستەیی لە تیرۆری بیرکردنەوە و بەیان و بڵاوکردنەوە و رادەربریندا، دەست پێدەکات.پیش ئەوەی رێگەی تیرۆری جەستەیی نەیارانی سیاسی پێشمەرگە و گەریڵا، کۆمۆنیستەکان، نووسەر و شاعیر، رۆژنامەنووس، لێکۆڵەر، میژوو نووس و.... دەست پێبکات، بەسادەیی پاساوی هێناوەتەوە بۆ ئەو تۆمارە دوور و دڕێژی لەسەر دەستی پارتی و بنەماڵەی بارزانی ئەنجامدراوە،لە خوارەوە پێکەوە گەشتێک دەکەین بۆ ناو جیهانی تاریکی کووشتن و تیرۆر و ڕەفاندنی مرۆڤە مەزنەکانی ناو مێژووی ئازادیخۆازی گەلی کورد لە هەموو پارچەکانی کوردستان کە لە کارنامەی 72ساڵەی پارتی دیمۆکراتی کوردستان دا تۆمار کراوە و ئاسەواری ئەم هەمووە زووڵم و تاوان و ستەمە بەهیچ شێوەیەکی یاسایی و غەێرە یاسایی پاک نابێتەوە.
پارتی لە دامەزراندنیەوە (١٩٤٦) ھەتا سەرەتای دوولەت بوونەکەی ساڵی (١٩٦٤٤) وردە وردە رێچکەی حیزبێکی بنەماڵەیی کۆنەپەرستی گرتۆتەبەر، ھەتا لە کۆنگرەی ٨ ی ساڵی ١٩٧٠ لە ناوپردان، بە یەکجاری بوو بە حیزبی ئۆلیگارشی بنەماڵەیی. لەو کۆنگرەیەدا بۆ یەکەمجار کوڕانی(مەلا مستەفا بارزانی)، ئیدریس و مەسعود بوونە ئەندامی سەرکردایەتی، دواتر بوونە مەکتەب سیاسی و پاسەوانی بەرژەوەندییەکانی عەشیرەی بارزانی.
 وەک ھەردوو مێژوونووسی کورد جەرجیس فەتحوڵڵا و ئەیوب بارزانی دەگێرنەوە، لەو کۆنگرەیەدا تەزویر بۆ ھەردوکیان کراوە بۆ ئەوەی دەنگیان وەکو یەک بێ، تا کێشە بۆ بنەماڵەی بارزانی دروست نەبێ! بەو پێیە، جوتە برا، یەکی ٤٥٠ دەنگی خشتیان “ھێنا” و گەیشتنە لوتکەی ناوەندی بڕیار (بڕوانە: جرجیس فتح اللە، زیارە للماچی القریب، ستوکھولم، دار الشمس للگباعە والنشر، ێ٦٧. ھەروەھا، ایوب بارزانی، الحرکە التحرریە الکوردیە وێراع القوی الاقلیمیە والدولیە، ١٩٥٨- ١٩٧٥، جنیف، دار نشر المشرق، گ١، ێ٣٩٣).
 ئەمە یەکەم نیشانە و یەکەم گورزی بە بنەماڵەیی کردنی پارتی بووە کە گەلی کوردستان تا ئێستا باجەکەی دەدات.ئەو کۆنگرەیە خاڵی وەرچەرخانە لە مێژوی پارتی و خەڵکی کوردستاندا. چونکە بنەماڵەی بارزانی، بەری ڕەنجی شەش ساڵ ھەوڵ و تەقەللای خۆی چنیەوە و توانیی لە رێگەی کۆنگرەکەوە بە بنەماڵەیی کردنی پارتی بشەرعێنێ. دوای ئەو کۆنگرەیە، بارەگای بارزانی بووە گرنگترین دامەزراوەی پارتی. بارەگای بارزانی پێکھاتبوو لە بارزانیی باوک و ھەردوو کوڕەکەی. ھەمو بڕیارە چارەنووسسازەکان: تاکتیک و ستراتیژی شۆڕش؛ شەڕ و ئاشتی؛ مفاوەزات کردن و نەکردن؛ بەستنی پێوەندی و تێکدانی، چ ناوەکی و چ دەرەکی؛ سامانی شۆڕش و خەرج کردنی؛ دانان و لابردنی بەرپرسە سیاسی و سەربازیەکانی شۆڕش؛ گرتن و کوشتن و راوەدونانی نەیارانی بنەماڵە، ھەمویان لەو بارەگایەوە دەر دەچوون. تەنانەت ئاشبەتاڵپێکردنی شۆڕشی ١٤ ساڵەی کوردیش، لە ١٩/٣/١٩٧٥ دا، ھەر بە بروسکەیەکی ئەو بارەگایە، را گەیەنرا. لەو کۆنگرەیە بە دواوە تا ئێستا، رۆڵی مەکتەب سیاسی و کۆمیتەی سەرکردایەتی و دەزگەکانی پارتی بووە بە ڕایی کردنی بەرژەوەندی بنەماڵە و جێبەجێ کردنی داواکانی.
پەروەردەی کۆمەڵایەتی و سیاسیی ئەم بنەماڵەیە بریتیە لە( خۆ، بە خودا کردن). لەبەر ئەوە منداڵیان، لەو رۆژەوەی رستە تێدەگا و ئاوەز پەیا دەکا،لەسەر ئەو ئیدۆمەی پەروەردە دەکرێت کە، ئەو جیایە لە مناڵی کەسانی تر. گۆشی ئەکەن و پێی ئەڵێن: “تۆ نەوەی بنەماڵەیەکی شۆڕشگێڕی؛ باوک و باپیری تۆ خودانی کورد بوون و تۆش لە ئایندە دا ئەبی بە خودانیان؛ باوک و باپیری تۆ نەبوونایە کورد نە دەبوو؛ بەرژەوەندی کورد و بەرژەوەندی بنەماڵەکەمان ئاوێزانن، لێک جیا نا کرێنەوە؛ ھەرچی لە بەرژەوەندی ئێمە بوو خۆ بە خۆ لە بەرژەوەندی کوردە؛ ئەم نیشتمانە و سامانەکەی ئێمە نە بووینایە نە دەبوون، بۆیە بۆمان حەڵاڵن”.
چەند نمونەیەک بۆ سەلماندنی ئەو ڕاستیە:
نمونەی یەکەم: مەسعود بارزانی لە کۆنگرەی ١٣ ی حیزبەکەیا (١١- ١٨/١٢/٢٠١٠) ناوی کوڕەزایەکی خۆی ھێنا، کوڕی مەسرور و، وتی، فڵانی کوڕەزام پێی وتم، باپیرە خەم مەخۆ من کوردستان/ کەرکوک؟ رزگار ئەکەم (وەر گیراوەکە دەق نیە، پاڵفتەی قسەکانێتی). کوڕەزاکەی شەش ساڵ لەمەو بەر ٣- ٤ ساڵان بووە.
نمونەی دووەم: چەن ساڵێ لەمەوبەر کوڕە گەورەی نێچیروان بارزانی، کە ئەو کات ١٢- ١٣ ساڵان بوو، وتی، ئەم خۆشگوزەرانیەی خەڵکی کوردستان، بەرھەمی رەنجی باوکمە. بە مەرجێ، ھەمووی پارەی بەغدا بوو، باوکی یەک تنۆک ئارەقی نە رشتبوو بۆ پەیا کردنی.
نمونەی سێیەم: گۆیا، یاسری کوڕی مەنسور بارزانی، لە نۆڤەمبەری ٢٠١٦٦ دا بە رۆژنامەی نیویۆرک تایمزی ئەمریکی وتوە: “وەک چۆن ھەمیشە گوڵە بەڕۆژە روی لە خۆرە، ئەبێ گەلی کوردیش بە ھەمان شێوە روی لە سەرۆک مەسعود بارزانی بێ”.ئەم جۆرە پەروەردە کۆمەڵایەتی- سیاسیە، کەسانێک ئە خولقێنێ کە بێجگە لە خۆی و بەرژەوەندیەکانی خۆی، چاوی کەسی تر و رەوتی تر و بۆچونی تر و بەرژەوەندی تر و رەنگی تر و بەرنامە و پرۆگرامی سیاسیی ھیچ حیزبێکی تر، نا بینێ. ئەم پەروەردە سەقەتە، زنجیرەیەکی نەبڕاوەیە. وەکو ھێلکە و مریشک بەردەوام یەک یەک دروست دەکەنەوە، یەک یەک بەرھەم ئەھێننەوە؛ بێ ئەوەی گۆڕانی ئەرێنی بەسەر ئاوەز و بیرکردنەوە و مینتاڵێتی ئەم گروپەدا بێ. لەبەر ئەوە ھەمیشە پیرەکانیان وەکو گەنجەکانیان و گەنجەکانیشیان وەکو پیرەکانیان بیر دەکەنەوە لە کردەوە و جووڵاندا: کۆپی کردنەوەی بەردەوام و بێ بڕانەوە. کاتێ مرۆڤ لە مناڵیەوە بەو شێوەیە پەروەردە دەکرێ، کە گەورەش دەبێ، لە پڕ دەبێ بە ئەندامی مەکتەب سیاسی حیزب و خۆی لە ناو جێگە و سامان و دەسەڵات و حەشەم و خەدەمە دا دەبینێتەوە و سەرە زل و بەتەمەنەکانی حیزبیش دەستیان بە سنگەوە بۆ ڕادەگرن و لە بەردەمیانا دەچەمێنەوە، دەچێتە رۆحیەوە کە ماڵە باوانی راستیان پێوتوە: “ئەم جیاوازە” “ئەم خودانی حیزب و خاک و خەڵکیشە!”، ئیتر ھەر کەس لە چوارچێوەی حەز و بەرژەوەندیی بچێتە دەر، ئاسانترین شت لای، ئەوەیە، بڕیار بدا گیانی بکێشێ و لە ناوی بەرێ. ئەم تیپە لە مرۆڤ، ھەرگیز ناتوانێ نان و ئازادی و کەرامەت بۆ خەڵک فەراھەم بکا؛ مادام پەروەردەی کۆمەڵایەتی- سیاسی یشی رێگەی پێ نادا، بێجگە لە خۆی کەسێکی کە لەسەر کورسی دەسەڵات ببینێ، ناڕەزایەتی دەسەڵاتی و حوکمڕانیی پەیدا دەبێ. بۆ ئەوەی ناڕەزایەتی نە ھێڵێ یان کپ بکا، رێگەچارەی نیە پەنا بردن بۆ توند و تیژی نەبێ. دەیان و سەدان ھەزار کەس لە ناو کۆمەڵی کوردستانا بڕوایان بە مێژو و خەبات و “پیرۆزیی بنەماڵەی بارزانی!” و پارتی ھەیە. بەڵام ئەمە دڵیان ئاو نادا. “ئەبێ، وەکو ناسری کوڕی مەنسور بارزانی وتویەتی” ھەمو کۆمەڵ بڕوای بە “پیرۆزیان” ھەبێ و ملکەچیان بن . بۆ ھێنانە دی ئەو حەز و خەونە، پەنا بۆ دو رێگا ئەبەن: “دەم چەور کردن” و “تۆقاندن و کوشتن”. بە رێگەی یەکەم، توانیویانە ھەزاران کەس و سیاسی و قەڵەم و بە ناو رۆشبیر بکڕن. ھەر کەس مل بۆ ھیچکام لەو دوو رێگەیە درێژ نەکا، ئەی خەنە بەر غەزەبی خۆیان؛ ھەوڵی کوشتنی فیزیکی، ئەگەر پێیان نە کرا، ھەوڵی کوشتنی سیاسی و کۆمەڵایەتی دەدەن: دەیگرن و دەیخەنە زیندانەوە… ناوی دەزڕێنن… تۆمەتی دەدەنە پاڵ… فایلی بۆ رێک دەخەن… چیرۆکی بۆ ھەڵدەبەستن… تەخوینی دەکەن.
بەشێک لە رۆژمێری خیانەت و تیرۆرکردنی کورد لەسەر دەستی بنەماڵەی بارزانی:
 کوشتنی سیاسی لە مێژوی پارتیدا: پارتی، لە دروست کردنیەوە ھەتا ھاتنەوەی بارزانیی باوک لە یەکێتیی سۆڤێتەوە بۆ عێراق، لە کوردستان ھیچ ھەوڵێکی تیرۆری فیکریی و فیزیکی بوونی نەبووە، چ لە ناوخۆیدا، چ لەگەڵ حیزبەکانی تر. بەڵام، یەکێ بیرەوەریەکانی زرار سڵێمان بەگ دەرگەڵەیی خوێندبێتەوە (بیرەوەریەکانم لە ساڵانی ١٩٤٣- ١٩٧٧)، بۆی دەر دەکەوێ کە بارزانیی باوک لە سۆڤێتیش ممارەسەی تیرۆری فیکری کردوە لەگەڵ ھەڤاڵەکانی. لێ، کاتێ بارزانی گەڕایەوە بۆ عێراق، تیرۆری فیکری و کوشتنی فیزیکی و سیاسیی لای پارتی، چ لەناوخۆی و چ لە دەرەوەی خۆی، بە خێرایی گەشەی کردوە.لەم نووسینەدا بە خێرایی ئاوڕێ لەم ئاوە رژاوە دەدەینەوە:
١ـ لە ٣٠ ی حوزەیرانی ١٩٥٩٩دا، بارزانیی باوک لە بەغدا، چەکدارەکانی خۆی ناردە سەر ھەمزە عەبدوڵڵای سکرتێری پارتی و، لە پارتی دەریکرد، لەسەر جیاوازیی بۆچوون. ئەگەر پێش گەیشتنی چەکدارەکان بە بارەگای مەکتەب سیاسی پارتی، ھەمزە عەبدوڵڵا ھەڵ نەھاتبایە، دەکوژرا. دوایی، بۆ کوشتنی کەسێتیی، بارزانی و پارتی سەدان جۆرە کێشە و بوختانیان بۆ ھەڵبەست.
٢ـ ساڵی ١٩٦٣٣ پارتی لە ناو شاری سلێمانی کەوتە راوکردنی کادیرە چالاکەکانی حیزبی شیوعی و ژمارەیەکی لێ شەھید کردن. گوندی کانی ماسیی خوار سلێمانی ببووە قەبرستانی “نەیارانی!” پارتی. لەو بارەیەوە مەلا ئەحمەدی بانی خێڵانی لە بیرەوەریەکانیدا دەگێڕێتەوە: “لای بارزانی سکاڵایان لە بکوژەکانی کادرەکانیان کردوە… رۆژێ کە لە لای بارزانیەوە ھاتۆتەوە، لە رێگا توشی قالە تەگەرانی و … بو وە بەرەو بارەگای بارزانی رۆیشتون… دڵیخۆش بووە وای زانیوە بارزانی بۆ گرتن و سزادان بانگی کردون، کەچی لەو لاوە بە دیاری بارزانیەوە گەڕاونەتەوە”.
٣ـ دوای کەرت بونەکەی ١٩٦٤٤، سەرۆکی پارتی کەسێکی نارد بۆ کوشتنی ناھیدە خانی کچی شێخ سەلامی شاعیر (دایکی د. رۆژ نوری شاوەیس). پێنج- شەش فیشەکی بەرکەوت، خوا نەی کوشت. ئەو کاتە ئەندامی کۆمیتەی سەرکردایەتی پارتی بوو و نوری شاوەیسی مێردیشی ئەو کاتە ئەندامی مەکتەب سیاسی و لەگەڵ جەلالیەکان بوو.
٤٤ـ پێش جیابونەوە و دوای سەر ئاو کەوتنی ناکۆکیەکانی سەرۆکی پارتی و مەکتەب سیاسی، سەرۆکی پارتی بۆ سوک پیشاندانیان لە ناو خەڵک و پارتی و ھێزی پێشمەرگە دا، مامۆستا برایم ئەحمەد و مام جەلاڵی بە ناوی خۆیان ناو نە دەهێنا، پێی دەگووتن: بلە و جەلە. بۆ شکاندن و کوشتنی کەسێتی یشیان، قسەی سوکی شوێن خستبوون. لە ھەنێ لە وەرگێڕەکانی جارانی بارزانیی باوکم بیستوە، کاتێ لە سەر ناکۆکی نێوان خۆی و باڵی جەلالی قسەی بۆ رۆژنامەنوسانی بیانی کردوە، قسەی سوکی بەو دو کەسێتی یە وتوە. کە ھەستی کردوە وەرگێڕەکان وەکو خۆی قسەکانی تەرجەمە نا کەن، بە جوڵانی دەستی و ئاماژە، رۆژنامەنوسە بیانیەکانی تێگەیاندوە چ جنێوێک یان پێ ئە دا.
٥ـ بەھاری ١٩٦٤٤، سەرۆکی پارتی ھێزێکی زۆری پێشمەرگەی ناردە سەر ماوەت بۆ کوشتن و گرتنی ئەندامانی مەکتەبی سیاسیی پارتی. بە شەڕ خۆیان دەرباز کرد و ھەڵاتن بۆ ئێران.
٦ـ حوزەیرانی ١٩٦٤٤، پارتی لە ماڵێکدا ھەر یەک لە عەلی حەمدی و مەحمودی حاجی تۆفیقـی رفاند. ھەردوکیان بە (اختفا) لە ناو شاری سلێمانی ئیشوکاری لقی چواری پارتی- باڵی مەکتەب سیاسی یان بەڕێوە ئە برد. یەکەم رۆژی ساڵی ١٩٦٦، بە فەرمانی بارزانی، ھەردوکیان گولـلە باران کران. تا ئێستا گۆڕیان ونە. عەلی حەمدی، خەڵکی ئاکرێ و کەسێکی رەنجدەر، خوێنەوار، رۆشنبیر و کورد پەروەر بو. ساڵی ١٩٤٣ یەکێک بو لە دامەزرێنەرانی حیزبی رزگاری. کاتی رفاندنی، لێپرسراوی لقی چواری پارتی- باڵی م. س بوو. رەحمەتی، مەحمودی حاجی تۆفیق یش کارگێڕی ھەمان لق بوو. ھەردوکیان پێکەوە رفێنران و پێکەوە شەھید کران. جێی داخێکی بە سوێ یە، مەحمودی حاجی تۆفیق، بارزانی بێ گۆڕی کرد، ئاراسی کوڕە تاقانەشی، ساڵی ١٩٨٥، بەعس لە سەر کۆمەڵە بوون گرتی و تا ئێستا بێ شوێنەوار و بێ گۆڕە!.
٧ ـ ساڵانی ١٩٦٧- ١٩٦٨٨ بارزانیی باوک دەیان سەرکردە و پێشمەرگەی کۆمیتەی شۆڕشگێری حیزبی دیمۆکراتی کوردستانی ئێرانی بە زیندویی یا کوژراوی ڕادەستی ساواک کرد. لەوانە: سولەیمان موعینی (فایەق ئەمین)، خەلیل شەوباش، ئیسماعیلی شەریف زادە، عەبدوڵڵای موعینی، مەلا ئاوارە (مەلا ئەحمەدی کوڕی مەلا محەمەد ئەمینی ھەمەوەندی)، مەلا رەحیمی وەرتێ (میرزا ئەحمەد)، ساڵح لاجانی و ھاوڕێکانی، موراد شیدیز و، دەیان پێشمەرگەی تر.هەر لە جەنگی ناوخۆی رۆژهەڵاتەوە تا دەگاتە شەڕی شنۆ و قیادەی مووەقەت.
 هەرچەندە ناوەندەکانی فیکری و لێکۆلێنەوەی حیزبی دیمۆکراتی کوردستان ئێران ئاماری تەواویی تیرۆر و شەهیدی کادیر و پێشمەرگە و نووسەر و رۆژنامەنووس و چاڵاکانی مەدەنی کوردی ئێرانی بڵاوکردۆتەوە و ژمارەی تیرۆر و کوژراوەکان زۆرە..
 لەهەندێک سەرچاوەی نهێنی پارێزراو دا هاتووە پێلانی تیرۆری سەرکردەی حیزبی دیمۆکراتی کوردستانی ئێران (دکتۆر سادەق شەرەفکەندی) لەلایەن بەکرێگیراوانی ئێران و بنەماڵەی بارزانی بەتایبەتی شەخسی نێچیرڤان بارزانی بووە،لەبەر هۆکاری ڕەخنە تووندەکانی دکتۆر سادەق شەرەفکەندی لە عەشیرەی بارزانی و خیانەتەکانیان لەدژی بزووتنەوەی ئازادیخۆازی کوردی رۆژهەڵات، نێچیرڤان بارزانی پێوەندی باشی لەگەڵ دکتۆر سادەق شەرەفکەندی نەبووە لەبەر هەڵوێستە تووندەکانی لە دژی بنەماڵەی بارزانی..
٨. ساڵی ١٩٧١١ بە سیناریۆی میتی تورکی و جێبەجێ کردنی بارزانیی باوک، ھەردوو سکرتێری گشتیی پارتی دیمۆکراتی کوردستان- تورکیا، سەعید ئاڵچی و دکتۆر شڤان کوژران و ئاشبەتاڵ بەو پارتە کرا. سەرەتا پاراستن لە گوندی قومری، نزیک سنوری تورکیا لە دیوی کوردستانی باشور، سەعید ئاڵچی کوشت. دوایی بە بیانوی ئەوەی دکتۆر شڤان، سەعید ئاڵچی کوشتوە، بە فەرمانی بارزانی خرایە زیندانی رایات و پاش چەن مانگێ گولە باران کرا.
٩. دوای ساڵی ٦٦٦، بارزانیی باوک چەن جارێک ھەوڵی داوە مام جەلال تیرۆر بکات. جارێک نامەی ناردوە بۆ رەحمەتیی مامۆستا ھەمزە عەبدوڵڵا، داوای لێ کردوە مام جەلال بکوژێ، لە بەرامبەرا لێیخۆش دەبێ (نامەکە لە بەردەستایە). جارێکیش دەزگای پاراستن پیلانی کوشتنی مام جەلالی داناوە و فەشەلی ھێناوە.
١٠. دوای دەرچونی کتێبی (پەنجەکان یەکتری ئەشکێنن)ـی کاک نەوشیروان (ساڵی ١٩٩٧٧)، بنەماڵەی بارزانی لە سەر بەشی (بە بۆنەی مردنی مەلا مستەفاوە: مەلایی و جەلالی لە تەرازو دا) نیازیان وابوو لە لەندەن تیرۆری بکەن. بە ھەڕەشەی مام جەلال وازیان لەو خەونە ھێنا.
١١. پاراستن ساڵی ١٩٧٣ لە سلێمانی یەوە کەسێکی نارد، لە ٢٢٢ ی تەموزا، لە بەغا، لە نزیک ماڵەکەی خۆی لە گەڕەکی کفاح، نزیک گۆڕەپانی (وپبە)، محەمەد حەسەن برزوی کوشت. ئەم جوامێرە، بازرگانێکی گەورەی فەیلیی ئیلامی بوو. خۆی و خێزانەکەی لە بەغا ئە ژیان. ساڵی ١٩٥٩ کە پارتی بە رەسمی ئیجازەی لە حوکمەتی عیراق وەر گرت، ئەم یەکێک بو لە داواکەرانی ئیجازەکە. ھەم بە پارە و ھەم بە خەبات خزمەتی زۆری پارتی کرد بو. دوای جیابونەوە لەگەڵ باڵی م. س بو. دوای بەیانی ١١ی ئازار و دوای تێکەڵاو بوونەوەی ھەردو باڵی مەلایی و جەلالی، محەمەد حەسەن برزو تێکەڵاو نە بوە وە و وازی لە حیزبایەتی ھێنا. لە سەر تێکەڵاونە بونەوە بە باڵی مەلایی، کوشتیان.
١٢٢. عوبەیدوڵڵا، کوڕە گەورەی بارزانی، لە سەر دو شت لەگەڵ باوکی و براکانی، ئیدریس و مەسعود ناکۆک بو: دژی تەوریپی پارتی بوو بۆ مەسعودی برای؛ دژی سیاسەت و رەفتاری باوکی و دو براکەی بوو. لە بەر ئەو دو ھۆیە و لە بەر ئەوەی لە رێگەی شەھید فاخر مێرگەسوری یشەوە ئاشنایەتی لەگەڵ بیری چەپ پەیا کرد بوو، باوکی زۆر رقی لێی بوو، دو جار ھەوڵی کوشتنی داوە. جاری یەکەم ساڵی ١٩٧٢ کە لە زیندانی خەلان زیندانی بوە. کە ئاگادار کراوە باوکی فەرمانی داوە ئەمشەو بکوژرێ، شەوی ٦/٦/١٩٧٢ لە زیندان ھەڵاتوە. ماوەیەک لە بلێ و بارزان خۆی حەشار داوە. باوکی ھەڕەشەی ناردۆتە سەر شێخ عوسمانی شێخ ئەحمەدی خودانی بارزان، عوبەیدوڵڵا لەو ناوە دەرکا. ناچار بوە لە کۆتایی ئەو ساڵەیا خۆی را دەستی رژێمی بەعس بکا. سەرەنجام بەعس ساڵی ١٩٨٣ لەگەڵ دو برای تری (لوقمان و سابیر) و ٨٠٠٠ بارزانیی ئۆردوگای قوشتەپە، شەھیدی کردن. جاری دوەم، گەرماوگەرم دوای ئاشبەتاڵ بوە، کاتێ بارەگای بارزانی لە نەغەدە بووە. بارزانی جەمیل مەحۆی بانگ کردوە و داوای لێ کردوە عوبەیدوڵڵای کوڕی بۆ بکوژێ، چی پارە داوا بکا ئەی دا تێ. جەمیل مەحۆ لە کتێبی (مژکراتی داخل سجون الپورە الکوردیە، جمیل محو، سکرتیر العام للحزب الدیمقراگی الکوردی، ١٩٨٢، ێ٢٥٣) ئە گێڕیتەوە و ئەڵێ: “کە ئەو داوایەی لێ کردم، ھەمو گیانم گرژ بو، لە حەسرەتا زمانم لە گۆ کەوت و یەک نوتقم بۆ نە درا”.سەیر ئەوە بوە، جەمیل مەحۆ لە ٢٨ ی مایسی ١٩٧١ وە ھەتا دوای ئەشبەتاڵ، لە سەر نزیکایەتی لە عوبەیدوڵڵا، بە فەرمانی بارزانی خرابوە زیدانی خەلانەوە.
١٣٣. شێخ عوسمانی شێخ ئەحمەدی خودانی بارزان، برازای بارزانیی باوک، لە سەر دو شت بارزانی رقی لێ ھەڵگرت: دژی تەوریس بوو بۆ مەسعود بارزانی؛ بارزانی ئەی ویست شێخایەتی یش بکەوێتە دەستی خۆی، لێ موریدەکانی خودانی بارزان بۆنی خودانیان نابوو بە شێخ عوسمانی کوڕیەوە. دوای ئەوەی بارزانی دڵنیا بوو شێخ عوسمان بە ھیچ ھەڕەشە و گەمارۆیەک نا گیرێ، بە سەرۆکایەتی خۆی، لە حوزەیرانی ١٩٧٤ و لە گەرمەی شەڕی نێوان سپای داگیرکەری بەعس و شۆڕشا، ھێزێکی گەورەی پێشمەرگەی کوردستانی بردە سەر شێخ عوسمان و بە خاوو خێزان و ھەمو مرید و دەروێشەکانیەوە راوی نان بەرە و ھەولێر و ناچاری کردن تەسلیمی رژێمی بەعس ببن. ئەو ٨٠٠٠ بارزانیەی لە قوشتەپە بەعس بردنی و کوشتنی، ھەر ھەمویان لە نەیارەکانی بنەماڵەی بارزانی بوون. میسریەکان پەندێکی جوانیان ھەیە بۆ حاڵەتی وا: “یقتل القتیل ویمشی فی جنازتە”.دکتۆر مەحمود عوسمان، سەبارەت بە دەرکردنی شێخ عوسمان، لە لاپەڕە ٣٦ ی چاپی یەکەمی کتێبی “تقییم مسیرە الپورە الکردیە وانھیارھا والدروس والعبر المستخلێە منھا ١٩٦١- ١٩٧٥) دا نوسیویەتی: “بارزانی نە خۆی و نە کوڕەکانی رۆژێ لە رۆژان نە سەریان لە شەڕگەیەک دا و نە نەخشەیان بۆ ھێرشێکی بەرنامەدار یا نەبەردیەک یا جەنگی پارتیزانی دانا، تەنیا جارێک کە بارزانی تیا چوە بەرەی شەڕ، ئەو جارە بوو کە بۆ ناوچەی بارزان چو، بۆ دەرکردنی شێخ عوسمان”.
١٤. پارتی لە ١٥ ی ١١ ی ١٩٦٨٨ دا، چوار گەنجی جوتیار و بێ دەسەڵاتی گەڵاڵەی باڵەکایەتی و گەنجێکی دەربەندی باڵەکایەتی، بە تۆمەتی جەلالی بون، گرت. تەمەنیان لە نێوان ٢٠- ٢٨ ساڵا بو. لە مایسی ١٩٦٩ بە فەرمانی لوتکەی دەسەڵات، ھەر پێنجیان بێسەر و شوێن کران. خەڵکی ناوچەکە ئەڵێن، زینەبەچاڵ کراون. تا ئێستا گۆڕیان ونە. ناویان: (رەسوڵ مستەفا رەسوڵ ئەحمەد ١٩٤٩، قادر حوسێن مەلا قادر ١٩٤٥، عەزیز حوسێن مەلا محەمەد ناسراو بە فەقێ عەزیز سەلامیەنی ١٩٤٢، حەسەن قادر محەمەد ئەحمەد ناسراو بە حەسەنی مەلا حاجی ١٩٤١، ئەنوەر رەسوڵ شێخە) بو.
١٥. ساڵی ١٩٧٢ (١٢٢) کادری حیزبی شیوعی عیراق لە دوای تەواو کردنی خولێکی سیاسی لە یەکێتیی سۆڤێت، لە رێگەی سوریاوە گەڕانەوە بۆ عیراق. کە داخڵی بادینان بون، لێپرسراوی سەربازیی پارتی لە بادینان، عیسا سوار، ھەر دوازدە کادرەکەی گرت و بێ سەروشوێنی کردن. ھەتا ئێستا گۆڕیان ونە.
١٦٦. دوای مردنی بارزانیی باوک، بە فەرمانی ئیدریس بارزانی و مەسعود بارزانی، شێخ محەمەدی ھەرسین، ئەندامی لیژنەی مەرکەزی پارتی، رفێنرا و بێ سەروشوێن کرا. تا ئێستا ژن و مناڵەکانی نازانن تەرمەکەی لە کویا نێژراوە یا فڕێ دراوە.
١٧٧. کۆمەڵکوژیی بنەماڵەی حەمەداغای مێرگەسۆر زۆر جێگەی تێڕامانە. حەمەداغا سەرۆکی عەشیرەتی شێروانی بوو کە عەشیرەتێکی گەورەی ناوچەی بلێ و بارزانە. حەمەداغا پیاوێکی کوردپەروەری شۆڕشگێڕ بوو. لە کۆماری کوردستان لە مەھاباد پلەی سەربازیی کۆلۆنێڵی درابویە و سەرپەرشتی بەرەی شەڕەکانی سەقزی کردبوو. دوای کەوتنی کۆمار، لەگەڵ شێخ ئەحمەدی خودانی بارزان گەڕایەوە عیراق. گیرا و سزای لە سێدارەدانی بۆ دەرچوو. سزاکەی کرا بە ٢٠ ساڵ و دوای بەسەر بردنی ٦ ساڵ، ئازاد کرا. لە ھەمو شەڕەکانی ناوچەی بارزانا بەشداری کردوە. چ ئەوانەی لە دژی حکومەت و سوپای عیراق بون، چ ئەوانەی دژی عەشیرەتەکانی دوژمنی شێخانی بارزان بوون. لە شۆڕشی ئەیلوولیشدا پلەی پێشمەرگایەتی گەیشتە ئامر ھێزی، ھێزی سەفین. فاخری کوڕی حەمەداغا گەیشتە پلەی ئەندامەتی لیژنەی مەرکەزیی پارتی. لە کۆنگرەی ٨ ی ساڵی ١٩٧٠ ی پارتیا ھەڵبژێردرا. پێشتر ناوبانگی فاخر بەھۆی سەرکردایەتی شەڕە بەناوبانگەکانی (کۆڕەک ١٩٦٤ و ھەندرێن ١٩٦٦) وە، ھەروەھا بەھۆی سەرکەوتنەکانی لە سەرکردایەتی شەڕەکانی نێوان مەلایی و جەلالی دا لە ھەمو ناوچەکانی سلێمانی، ناوبانگی ھەمو ناوچەکانی کوردستانی تەنیبوو. بە خزمایەتی یش تێکەڵی شێخانی بارزان بون: دایکی مەلا مستەفا، پوری باوکی حەمەداغا بوە. مەحبوبەی ژنی مەلا مستەفا، دایکی عەبەیدوڵڵا و ئەوان، پوری حەمەداغا بوە. کەچی نە ئازایەتی و کوردپەروەری و شۆڕشگێڕی و نە خزمایەتی دادی نەدان. لە ماوەی چەن ساڵێکدا بە فەرمانی مەلا مستەفا وێخ و واری بنەماڵەی حەمەداغا، لە بەر دو ھۆ: ترس لە توانای سیاسی و نفوزیان و ترس لە یەکگرتنیان لەگەڵ عوبەیدوڵڵای کوڕی لە دژی، لە بن دەرھێنرا و نێرینەیان لێ بڕین: ساڵی ١٩٦٣ لە بەرەی شەڕی بەرگری کردن لە بارزان دژی سپای عیراق، حوسێنی کوڕە گەورەی حەمەداغا شەھید بوو. لە تەموزی ١٩٧١ دا پاراستن لە ناو ھەولێر دا جەمیلی حەمەداغای کوشت. لە تەموزی ١٩٧٢ دا فاخر و سەعیدی برای و خەڵۆ برادۆستیی خزمیان، گیران و بێ سەروشوێن کران. تا ئێستا گۆڕیان ونە. لە نیسانی ١٩٧٢ ھەتا دوای ئاشبەتاڵ حەمەداغا و کوڕەکانی: رەشید، ئەسعەد، مەجید و جەوھەر لە زیندانەکانی رایات و خەلان زیندانی بوون. شەوی ٢٢ ی ئازاری ١٩٧٥، واتە سێ رۆژ دوای راگەیاندنی ئاشبەتاڵ لە لایەن بارەگای بارزانیەوە، گولەباران کران و تەرمەکانیان فڕێ دان. دوای چەن رۆژێ سۆراخ، خێزانەکانیان تەرمەکانیان دۆزینەوە.
١٨ـ لە ناوەڕاستی نەوەتەکاندا، پارتی لە ناو ھەولێر پەلاماری PKK ی دا و، نزیکەی ١٠٠٠ کادر و پێشمەرگەی بردن و بێ سەرشوێنی کردن. تا ئێستا گۆڕ و ھەواڵیان نییە..
١٩٩ـ سەرەتای ساڵانی ھەشتاکانی سەدەی رابردو، لە رێگەی راژان، لە چەقی دەسەڵاتی پارتیدا، بۆمبێک بە ئۆتۆمۆبیلەکەی فەتاح ئاغا دا تەقیەوە و شەھید بو. ئەو کاتە کۆنە کاژیکەکانی سلێمانی بەیاننامەیەکیان دەرکرد. تیدا تاوانی کوشتنەکەیان دایە پاڵ بنەماڵەی بارزانی. گۆیا فەتاح ئاغا بە تەما بوە واز لە پارتی بھێنێ، کە ھەستیان بە نیازی کردوە، بەو شێوەیە لە ناویان برد. پارتی تا ئێستا یادێکی ئەو پیاوە خەباتگێڕەی نەکردۆتەوە. فەتاح ئاغا کاژیک بوو، بەڵام بە ھەموو توانای خزمەتی بنەماڵەی بارزانی کرد. پیاوێکی ئازا و لەناو پێشمەرگەشدا خۆشەویست بوو.
٢٠٠ـ مەحەمەد رەحیم (ھەڤاڵ جوجەڵە)، ئەندامی سەرکردایەتی پارتی، لە ناوەڕاستی نەوەتەکان لە ھەولێر کوژرا. دوای کوشتنی نامەیەکی بڵاوبووەوە. بێزاری تیا دەر بڕی بوو. گومان خرایە سەر پاراستن، لە سەر ناڕەزایەتیەکانی ناو ئەو نامەیە، کوشتبێتی.
٢١١ـ نەقیب عوسمان نەورۆڵی بە ھەمان سیناریۆی مەحەمەد رەحیم لە ھەولێر کوژرا. بۆ ئەم یش گومان چوە سەر پاراستن.
٢٢٢ـ مردنی جەوھەر نامیق بەو شێوە سەیر و کتوپڕە، گومانی بردە سەر پاراستنی پارتی. رەفتاری خێزانی دوای مردنی، ئەی سەلمێنێ کە گومانیان لە پارتیە.
٢٣٣ـ مردنە سەیر و کتوپڕەکەی فەلەکەدین کاکەیی یش، ھەمان گومانی لە لای خێزانەکەی و خزمەکانی دروست کردوە. ئەمساڵ خێزانەکەی یادەکەیان بردە ھەڵەبجە و ھاوار.
٢٤ـ شەوی ٢٤ ی ٨ ی ٢٠١٥ فەرەیدەن جوانڕۆیی، ئەندامی مەکتەب سیاسی  پارتی و لێپرسراوی بەرەی خازر، کە چل ساڵ دەبوو خزمەتی بنەماڵەی بارزانی دەکرد، لە روداوێکی گوماناویدا کوژرا. ھەڵسوکەوتی پارتی لەگەڵ پاسەوانە بەرکەوتوەکانی تەکی و، پۆلیس و دەزگا ئەمنیەکانی پارتی و میدیای حیزب، ئەوەندە لێدوانی دژ بە یەکیان دا، زو گومان چووە سەر پارتی خۆی. سێ ھۆ بۆ کوشتنی لە لایەن پارتی خۆیەوە، لە ناو خەڵکدا دەماو دەم دەکەن: دژی درێژکردنەوەی ماوەی سەرۆکایەتی بارزانی بووە؛ لە روی مەسرور بارزانیدا وەستاوەتەوە؛ زانیاری ھۆی کێشانەوەی ھێزی پارتی لە بەردەم داعش لە شەنگاڵی، لە لابووە و، پێویست بووە بیباتە ژێر گڵ.
٢٥ـ لە ٢٣/٢٦ ی مایسی ١٩٩٣٣ دا رەوف کامیل ئاکرەیی، سەرۆکی رێکخراوی تێکۆشانی ڕەنجدەرانی کوردستان لە دھۆک کوژرا. کەسوکاری و ھەموان گومان لە پارتی دەکەن کوشتبێتی. پەنجە بۆ لێپرسراوێکی باڵای پارتی درێژ ئە کرێ. رەوف سیاسییەکی چەپی پاکی دڵسۆز و شۆڕشگێڕ بوو.
٢٦٦ـ ھەر لەو سەروبەندەدا پارتی دوو سیاسیی دیکەی لە شاری دھۆک تیرۆر کرد: ئەبو نەێیری حیزبی شیوعی و فرانسیس شابا.
٢٧ـ لە ٥ ی ئازاری ٢٠٠٨٨ دا مەفرەزەیەکی پاراستنی پارتی، نێردراو لە ھەولێرەوە، لە ناو کەرکوک لە گەڕەکی رەحیم ئاوا، لە سەر بیروڕا، دکتۆر عەبدولسەتار تاھیر شەریفی کوشت.
٢٨ـ سۆرانی مامە حەمە لە ٢١/٧/٢٠٠٨٨ دا لە کەرکوک، لە بەردەم ماڵی خۆیاندا کوژرا. کەسوکاری و دامەزراوەی میدیایی لڤین کە سۆران پەیامنێری بوو، پەنجەی تۆمەت بۆ پاراستنی پارتی درێژ دەکەن.
٢٩ـ سەردەشت عوسمان لە ٤/٥/٢٠١٠٠ دا بە بەرچاوی دەیان کەسەوە، لەبەردەم کۆلیجەکەیا رفێنرا. دوای دو رۆژ لە نزیک موسڵ دۆزرایەوە. بە شێوەیەکی زۆر دڕندانە کوژرا بوو. کەسوکاری و زۆرێک لە خەڵک دڵنیان کە پاراستنی پارتی کوشتویەتی.ئاسەواری تێکدان و ئەشکەنجەی جەستەیی پێش تەواو کردن و ڕۆح لێهەستاندنی قوربانیەکان لە پێشەی پاراستنی پارتیە...
٣٠ـ وەدات حوسێن ١٣/٨/٢٠١٦٦ لە ناو شاری دھۆک بە بەرچاوی دەیان کەسەوە رفێنرا و دوای چەن کاژمێرێک تەرمەکەی بە شێوێنراوی دۆزرایەوە کە زمانی قرتێندرا بوو و هەموو پەنجەکانی وەر وەر کرابوون و هەر دوو چاویشی بە زیندوویی دەرهێندرابوو و دواتر چەند فیشەکیان لە مێشکیدا بەتاڵ کردبوو. کەسوکاری و ملیۆنان لە خەڵکی کوردستان کوشتنەکەی بە دەستی پاراستنی پارتی دەزانن.
٣١ـ  د. وشیار ئیسماعیل، پێشنوێژ و وتارخوێنی مزگەوتی عومەر بندیانی، لێپرسراوی لقی ھەولێری یەکێتیی زانایانی یەکگرتوی ئیسلامی، شەوی ٢٢ ی ١١ ی ٢٠١٦ لە ماڵەکەی خۆیا بە چەکی بێ دەنگ کوژرا. گومان ئە کرێ لە سەر ئەو وتارانەی کوژرا بێ کە دژی زوڵمی دەسەڵاتداران لە مزگەوتەکەیا، ئەی دان. پۆلیسی ھەولێر باسی گرتنی بکوژەکان و دان پیا نان ئەکا، بەڵام بەھۆی نا بێلایەنی پۆلیس و دادگا و بونی پێشینەی ئەم جۆرە سیناریۆیانە، خەڵک بڕوا بە قسەی پۆلیس ناکەن. کەیسەکانی نوری نانەکەلی، فەرەیدون جوانڕۆیی، دکتۆر کەمالی سەید قادر، شێخ زانا، زەردەشت عوسمان، بارزان رەشید عوسمان، ودات حسێن، شوکری زەینەدین، و دەیان کەیسی تر، لە ھەولێر و دھۆک، ئەی سەلمێنن کە پۆلیس و دادگا لە سنوری قەڵەمڕەوی پارتیا، ئازاد و بێلایەن نین. بەڵکو تەواو لایەندارن، بۆیە ھەمو لێدوانێکی پۆلیس و بڕیارێکی دادگاکانی ھەولێر و دھۆک جێگەی گومانن و خەڵک بڕوایان پێ ناکەن.
٣٢ـ شوکری زەینەدین رێکانی، کامێرامانی کەناڵی ئاسمانیی KNN لە ١ ی ١٢ ی ٢٠١٦٦ دا، تەرمی لە نزیک گوندەکەی خۆیان، بانەسەر، سەر بە ناحیەی شیلادزێ و قەزای ئامێدی، دۆزرایەوە. پۆلیس و کاربەدەسانی پارتی لە ناوچەکە و میدیای پارتی ئەوەنە لێدوانی دژ بە یەکیان دا، گومان ببەنە سەر خۆیان.
٣٣ـ  ھەوڵدان بۆ کوشتنی مەعنەوی پارلەمانتاری بزوتنەوەی گۆڕان لە ئەنجومەنی نوێنەرانی عیراق، سروە عەبدولواحد، بەڵگەی زیندوە بۆ ئەوەی ئەم بنەماڵەیە ئەگەر نەتوانن نەیارەکەیان بکوژن یا بێدەنگ بکەن، ئەوا ھەوڵدەدن بی زڕینن. لێ، خۆیان ئەوەنە زڕاون و شکاون، دەس بۆ ھەر کەس بەرن، لە چاوی زۆرینەی خەڵکی کوردستانا ئە بێ بە پاڵەوان. سروە خان یش بو بە پاڵەوان. ھیوادارم لە گەڕی ئایندەدا خۆی کاندید بکات بۆ پۆستی سەرۆکی ھەرێم.
344ـ ھەوڵدان بۆ کووشتنی"مەولوود ئافەند"،رۆژنامەنووس و سەرنووسەری گۆڤاری ئیسرائیل ـ کورد و بەرپرسی دەزگەی ئیسرائیل ـ کورد لە عێراق و هەرێمی کوردستان لە ڕێککەوتی(2012 ژۆئەن8 )،لەسەر داوای کۆماری ئیسلامی ئێران وبەپێی بەڵگەنامەکانی وێکلیکیس کە ئاماژە بە نھێنی کووشتن و تیرۆری و ڕادەستکردنەوەی بە دەوڵەتی ئێران دەکەن،بۆ ئەو مەبەستەش "مەولوود ئافەند" لە ھەولێر لە ترسی پاراستنی بنەماڵەی بارزانی بەناچاری روو دەکاتە شاری سلێمانی بەمەبەستی سەفەر کردن و دەرچوونی لە کوردستان بۆ ئیسرائیل و ئەوروپا،بەڵام ئەندامانی پاراستن لە شاری سلێمانی بەھاوکاری ھێزێکی زانیاری کە پێوەندی نھێنیان لەگەڵ بنەماڵەی بارزانی و پاراستن و ئیتیڵاعاتی ئێران ھەیە بە پێلانێکی پێشوەختە ئامادەکراو لە ناو شاری سلێمانی و لە ناوچەی سەرچنار لە پێش کافتریا و مۆڵی ئیستانبووڵ بە بێھۆشکراوی دیڕەفێنن و دەیخەنە ناو ئۆتۆمبیلی دیپلۆماتەکانی سوپای قوودسی ئێران و دوایی لە تاران بۆ ماوەی چەندین ساڵ ئەشەنجە و لێدان و زیندانی چاڕەنووسی ئاشکرا دەبێت.
 پاراستنی بنەماڵەی بارزانی لەبەر ھۆکاری بڵاوکردنەوەی چەندین بەڵگەی نھێنی پێوەندییەکانی (مەڵا مستەفای بارزانی) و تیمی دەزگەی ھەواڵگری مۆساد لە کوردستان لە سەردەمی شۆڕش کە بارزانی باوک و ئیدریس و مەسعوود خۆیان ھاوکار و پەروەردە کراوی دەستی مۆساد بوونە،ھەڕەشەی کووشتنی لێدەکرێت،ئافەند بەگومانی ئەوەی کار بۆ دەزگەی زانیاری و یەکێتی دەکات و دەیھەوی پێوەندی باڵی نێچیرڤان بارزانی لەناو پارتیدا لەگەڵ کۆماری ئیسلامی ئێران تێکبدات،تیمی ھەماھەنگی نێوان پاراستن و زانیاری و ئیتیڵاعات ھەموو پێکەوە پیڵانی گرتن و تیرۆرکردنی ئەو رۆژنامەنووس بەڕێوەدەبەن،تاوانی ئەو رۆژنامەنووسە ئەوە بووە کە ھەوڵیداوە مێژووی پێوەندییەکانی پاراستن و بنەماڵەی بارزانی و مۆساد زیندوو بکاتەوە.
355ـ دواھەمین قوربانی تیرۆری سیاسی پارتی دیمۆکراتی کوردستان لەشاری ھەولێر کووشتنی چاڵاکوان و رۆژنامەنووس (سۆران سەقزی)بووە،کە چەند رۆژ پێش ئێستا لە شوێنەکەی خۆی کوژراوە و دەزگاکانی ئاسایش و پاراستنی بنەماڵەی بارزانی لە چەندین لێدوانی ناکۆک و دژ بەیەکدا ھەوڵیانداوە ھۆکارەی تیرۆرکردنەکەی بگەڕێنەوە بۆ تەواو نەبوونی باری دەروونی ئەو ڕاگەیاندنکاری کوردی رۆژھەڵات، کە کەوتۆتە ژێر گوشاری ماڵی و قەرزدار بوونەوە و بەم ھۆیەوە کۆتایی بەژیانی خۆی ھێناوە،بەڵام بنەماڵەی ناوبراو تەواویی ئەو دەنگۆ و ڕاپۆرتانەی دەزگاکانی ئاسایشی سەر بە پارتی دیمۆکرات و حکومەتی ھەرێمی کوردستان ڕەتدەکەنەوە،ئەوان گومانی ئەوەیان ھەیە کە سۆران سەقزی بە پیلانی ئیتیڵاعات و پارتی دیمۆکرات تیرۆر کراوە..
 بەو شێوەیەی بنەماڵەی بارزانی دواھەمین بزماری خۆیان لەسەر تابووتی ئازادی دا و کارنامەی خۆیان ھەر رۆژ بە کووشتن و تیرۆری تری رۆژنامەنووس و چاڵاکڤانانی پارچەکانی تری کوردستان ڕەنگینتر دەکەن.
تەواوی ئەو شەخسانە لە سەر فیکر و سیاسەت کوژراون، یا ھەوڵیان داوە بیانکوژن. ھەتا ئەو رۆژەی دادگایەکی پاکی سەربەخۆ و بێلایەن کەیسەکانیان یەکلایی دەکاتەوە، تۆمەتباری یەکەم پارتیە. چارە؟ بۆ ئەوەی دەستی کوشتن، لە سەر سیاسەت و بیروڕای جیاواز، بۆ تا ھەتایە ببڕدرێ، پێویست دەکات بەیاسا و بە گوشاری سیاسی و کۆمەڵایەتی، رێگە نەدرێ بنەماڵەی بارزانی بە شەرعیەتی شۆڕشگێڕانە حوکمڕانی وڵات بکەن. ئەبێ رێگە نەدرێ زیاد لە قەبارەی (هەڵبژیردراو)ـیی خۆیان بەشداری لە دروستکردن و جێبەجێ کردنی بڕیاری سیاسی، ئابوری، جڤاکی،رۆشنبیری و... دا بکەن. بە پێچەوانەوە، گەورەترین مەترسی لەسەر ئێستە و ئایندەی کورد لە ھەر چوار پارچەی کوردستان، ئەم بنەماڵەیە دەبن.
تێبینیی؛
 لەو نووسینەدا سوود لە کۆمەڵێک سەرچاوەی تایبەتی مێژووی شۆڕشی کورد و سیاسەتی سەرکردەکانی کورد وەرگیراوە و لەسەرەوە ئاماژە بەناوی چەندین سەرچاوە کراوە و بەشێک لە زانیارییەکانی ناو ئەم لێکۆلێنەوەیە وەک خۆی بێ دەستکاریکردن نووسراوەتەوە،وەک ناو و ڕێککەوتی تیرۆرەکان و شوێنەکان.....
 فەریبورز ئاودانان

No comments:

Post a Comment

 
 
Blogger Templates